پووختەی هەواڵەکە

• عێراق لە شەش مانگی یەکەمی ئەمساڵدا ڕووبەڕووی کورتهێنانێکی گەورەی دارایی بووەتەوە و بڕی کورتهێنانەکە زیاتر لە 21 تریلیۆن دینار بووە.

• زۆربەی داهاتەکانی عێراق پشت بە فرۆشی نەوت دەبەستن و لە بەرامبەردا زۆرینەی خەرجییەکانیش بۆ مووچە و پێداویستییەکانی بەکاربردن تەرخان کراون.

• حکومەتی فیدراڵ زیاتر لە شەش تریلیۆن دیناری بۆ هەرێمی کوردستان ناردووە و لە بەرامبەریشدا هەرێم بەشێک لە داهاتی نانەوتیی گەڕاندووەتەوە.

---

بەگوێرەی زانیارییەک، کە بە کەناڵ8 گەیشتووە، لە شەش مانگی یەکەمی ئەمساڵدا عێراق 21 تریلیۆن و 241 ملیار دینار کورتهێنانی هەبووە. کۆی داهاتەکان 35 تریلیۆن و 945 ملیار دینار بوون، لە کاتێکدا کۆی خەرجییەکان گەیشتوونەتە 57 تریلیۆن و 186 ملیار دینار.

---

وردەکاریی داهات و خەرجییەکانی عێراق

• داهاتی نەوت بڕی 28 تریلیۆن و 506 ملیار دینار بووە و 80%ـی کۆی داهاتی پێکێناوە.

• داهاتی نانەوتیی عێراق گەیشتووەتە حەوت تریلیۆن و 439 ملیار دینار کە دەکاتە 20%ـی داهاتەکان.

• بڕی 54 تریلیۆن و 672 ملیار دینار بۆ خەرجیی بەکاربردن و مووچە و پێداویستیی ڕۆژانە تەرخان کراوە.

• تەنیا دوو تریلیۆن و 513 ملیار دینار بۆ وەبەرهێنان خەرج کراوە کە تەنیا 4.39%ـی کۆی خەرجییەکانە.

پشکی هەرێمی کوردستان و خەرجیی وەزارەتەکان

حکومەتی فیدراڵ بڕی شەش تریلیۆن و 285 ملیار دیناری بۆ تەمویلی مووچەی فەرمانبەرانی هەرێمی کوردستان ڕەوانە کردووە و لە بەرامبەردا وەزارەتی دارایی هەرێمی کوردستان 573 ملیار و 386 ملیۆن دیناری وەک داهاتی نانەوتی بە کاش ڕادەستی عێراق کردووە. لەسەر ئاستی دامەزراوەکانیش، وەزارەتی دارایی بە 13 تریلیۆن و 509 ملیار دینار زۆرترین خەرجی هەبووە و لە سێ سەرۆکایەتییەکەشدا، ئەنجوومەنی وەزیران بە خەرجکردنی سێ تریلیۆن و 937 ملیار دینار لە پلەی یەکەمدا دێت.

زانیاریی زیاتر لەسەر بابەتەکە

بەگوێرەی خشتەکانی وەزارەتی دارایی، کورتهێنانی دارایی عێراق گەیشتووەتە 37.1%ـی کۆی خەرجییەکان. لە دوای وەزارەتی دارایی، وەزارەتی ناوخۆ بە شەش تریلیۆن و 660 ملیار دینار و وەزارەتی پەروەردە بە پێنج تریلیۆن و 534 ملیار دینار زۆرترین خەرجییان هەبووە. هەروەها لە خەرجیی سەرۆکایەتییەکاندا، ئەنجوومەنی نوێنەران 297 ملیار دینار و سەرۆکایەتیی کۆمار 23 ملیار دیناریان لە شەش مانگی یەکەمی ئەمساڵدا خەرج کردووە.

زانیاریی زیاتر بۆ تۆ

عێراق بۆ پڕکردنەوەی کورتهێنانی 13 تریلیۆن دیناری چەند بڕیارێکی توند دەدات

هەوڵەکانی وەرگرتنەوەی 50 ملیار دۆلار لە بەرپرسە گەندەڵەکانی عێراق

ڕاوێژکاری زەیدی: کورتهێنانی دارایی عێراق دەگاتە 80 تریلیۆن دینار

بودجەی 2027ی عێراق؛ کورتهێنانێکی 100 تریلیۆن دیناری و مەترسییەکانی سەر نەوت