وەزیری گەیاندنی عێراق: بۆ تاوتوێکردنی کێشە هەڵواسراوەکان داوەتکراوم بۆ هەولێر
پووختەی هەواڵەکە
- مستەفا سەنەد، وەزیری گەیاندنی عێراق ئاشکرایکرد لەلایەن سەرۆکوەزیران و وەزیری گواستنەوە و گەیاندنی هەرێمی کوردستانەوە داوەتکراوە بۆ سەردانیکردنی هەولێر.
- سەردانەکەی وەزیری گەیاندنی عێراق بۆ هەولێر لەکاتێکدایە کە رێکاری توند بەرامبەر کۆمپانیای کۆڕەک تیلیکۆم گیراوەتەبەر و نوسینگەکانی لە چەند ناوچەیەکی عێراق داخراون.
- دەستەی ڕاگەیاندن و پەیوەندییەکان جەخت دەکاتەوە کێشەی کۆڕەک تەواو هونەرییە و پەیوەندی بە سیاسەتەوە نییە و کۆمپانیاکە پابەندی پاکتاوکردنی قەرزەکانی نەبووە.
بەگوێرەی زانیارییەک، کە بە کەناڵ8 گەیشتووە، مستەفا سەنەد، وەزیری گەیاندنی عێراق ڕایگەیاندووە بەفەرمی لەلایەن وەزیری گواستنەوە و گەیاندنی حکومەتی کاربەڕێکەری هەرێمی کوردستان داوەتکراوە بۆ سەردانیکردنی هەولێر، بەمەبەستی تاوتوێکردنی ئەو کێشە هەڵواسراوانەی پێشتریش لە نێوان هەردوولادا هەبوون.
ڕێکارەکانی بەرامبەر کۆڕەک تیلیکۆم و کۆبوونەوەکانی بەغداد
- داوەتکردنی وەزیری گەیاندنی عێراق هاوكاتە لەگەڵ قوڵبوونەوەی کێشەکانی کۆمپانیای کۆڕەک تیلیکۆم و داخرانی نووسینگەکانی لە شارەکانی ناوەڕاست و باشووری عێراق.
- هەفتەی ڕابردوو ئانۆ جەوهەر، وەزیری گواستنەوە و گەیاندنی حکومەتی کاربەڕێکەری هەرێمی کوردستان سەردانی بەغدادی کرد و لەگەڵ مستەفا سەنەد و بەلیغ ئەبوکەلەل کۆبووەوە.
- سەرڕای بڵاوبوونەوەی دیمەن و ڤیدیۆی کۆبوونەوەکە لە پێگە فەرمییەکانی وەزارەت، بەڵام دواتر بەبێ پێدانی هیچ ڕوونکردنەوەیەک لە تۆڕە کۆمەڵایەتییەکان ڕەشکرانەوە.
هۆکاری کێشەکان و قەرزەکانی کۆڕەک
بەلیغ ئەبوکەلەل، سەرۆکی دەستەی ڕاگەیاندن و پەیوەندییەکان ڕایگەیاندووە کێشەی کۆڕەک تەواو هونەرییە و پەیوەندی بە سیاسەتەوە نییە، هەروەها ئاشکرای کرد کۆمپانیای کۆڕەک تیلیکۆم بڕی 4 تریلیۆن دینار و 1 ملیار دۆلار قەرزارە و پابەندی گرێبەستی پاکتاوکردنی قەرزەکانی نەبووە.
زانیاریی زیاتر لەسەر بابەتەکە
پرسی سەردانیکردنی وەزیری گەیاندنی عێراق بۆ هەولێر لەکاتێکدایە کە لەلایەک کێشەکانی کۆڕەک تیلیکۆم گەیشتوونەتە ئاستێکی باڵا، لەلایەکی دیکەشەوە ئاماژە بەوە دەکرێت کێشەی ڕۆژانەی هاووڵاتییان لە بوارەکانی مووچە و سووتەمەنیدا بە هەڵواسراوی ماونەتەوە. سەرەڕای ئەوەی وەزارەتی نەوتی عێراق ئامادەیی نیشانداوە بۆ دابینکردنی سووتەمەنی بەرامبەر ڕادەستکردنی 50 هەزار بەرمیل نەوتی ڕۆژانە، بەڵام هێشتا ههنگاوی كردهیی بۆ ڕێککەوتن لەسەر ئەو پرسانە و داوەتکردنی وەزیرە پەیوەندیدارەکانی دیکەی عێراق نەنراوە.
زانیاریی زیاتر بۆ تۆ
سەرۆکى دەستەى ڕاگەیاندن و پەیوەندییەکان: کێشەى کۆڕەک تیلیکۆم کێشەى ئەمڕۆ نییە
دەستەی ڕاگەیاندنی عێراق ناوەندی سەرەکیی کۆڕەک تیلیکۆمی لە بەغداد داخست
2 کاتژمێر پێش ئێستا