پووختەی هەواڵەکە:

• یەدەگی نەوتی ئەمریکا دوای شەش مانگ لە جەنگی ئێران بۆ 286.6 ملیۆن بەرمیل پاشەکشەی کردووە.

• واشنتن لە سەرەتای دەستپێکردنی جەنگەوە تاوەکو ئێستا 142.3 ملیۆن بەرمیل نەوتی یەدەگی ستراتیژیی خەرج کردووە.

• دابەزینی یەدەگەکان بۆ خوار 250 ملیۆن بەرمیل، مەترسیی تەکنیکی بۆ سەر کۆگاکانی تەکساس و لویزیانا دروست دەکات.

• شیکەرەوەکان هۆشداری دەدەن کە دابەزینی یەدەگی ئەمریکا مەترسیی پەککەوتنی ئابووریی جیهانی لێدەکەوێتەوە.

---

بەهۆی جەنگی شەش مانگەی نێوان واشنتن و تاران، یەدەگی ستراتیژیی نەوتی ئەمریکا گەیشتووەتە ناوچەی مەترسی و نزمترین ئاستی لە ساڵی 1980ـەوە تۆمار کردووە. ئەم دابەزینە مێژووییە کە بڕەکەی 142 ملیۆن بەرمیلە، گومانی گەورەی لای بازاڕەکانی وزە دروستکردووە کە ئایا ئەمریکا دەتوانێت لە ئەگەری داخستنی درێژخایەنی گەرووی هوورمزدا، سەقامگیریی بازاڕی جیهانی بپارێزێت.

---

ئامارەکانی یەدەگی نەوتی ئەمریکا:

• پێش دەستپێکردنی جەنگی ئێران لە مانگی شوباتدا، ئەمریکا خاوەنی 428.9 ملیۆن بەرمیل نەوتی کۆگاکراو بوو.

• دوای شەش مانگ لە جەنگ و گەمارۆ دەریاییەکان، ئەم بڕە بۆ 286.6 ملیۆن بەرمیل کەمبووەتەوە.

• هەرچەندە ئاژانسی نێودەوڵەتیی وزە داوای خستنەڕووی 172 ملیۆن بەرمیلی لە ئەمریکا کردبوو بۆ هێورکردنەوەی بازاڕ، بەڵام واشنتن کەمتر لەو بڕەی ناردووەتە بازاڕەکان.

مەترسییە تەکنیکی و ئابوورییەکان:

شارەزایانی وزە هۆشداری دەدەن کە ئەگەر ئاستی یەدەگی ئەمریکا بگاتە خوار 250 ملیۆن بەرمیل، کۆگا زەبەلاحەکانی ویلایەتی تەکساس و لویزیانا ڕووبەڕووی کێشەی تەکنیکی دەبنەوە و ناتوانن بە شێوەیەکی ئاسایی نەوت بگەیەننە بازاڕە جیهانییەکان. لە ئەگەری بەردەوامیی ئەم دۆخەدا، ئابووریی جیهان ناچار دەبێت بەکاربردنی وزە کەم بکاتەوە، ئەمەش ڕاستەوخۆ دەبێتە هۆی پاشەکشەی ئابووریی جیهانی.

بژاردە بەدیلەکان و دۆخی بازاڕ:

ئەمریکا بۆ قەرەبووکردنەوەی ئەم دابەزینە، چاوی لە ڕێککەوتن لەگەڵ ڤەنزوێلایە بۆ کۆنتڕۆڵکردنی یەدەگەکانی ئەو وڵاتە، بەڵام ئەم پڕۆسەیە ساڵانێکی زۆری پێویستە و چارەسەری بەپەلە نییە. هاوکات، دوای هێرشەکانی ئەمریکا بۆ سەر دوورگەی لارک و وەڵامدانەوەکەی ئێران، نرخی نەوت 2% زیادی کردووە. ئاژانسی نێودەوڵەتیی وزە پێشبینی کورتهێنانی بەردەوام لە خستنەڕووی جیهانیدا دەکات، ئەمەش فشارەکان لەسەر واشنتن زیاتر دەکات کە لە ئێستادا نزمترین ئاستی یەدەگی نەوتی لە 44 ساڵی ڕابردوودا هەیە.

زانیاریی زیاتر بۆ تۆ

یەدەگی نەوتی ئەمریکا بۆ 357 ملیۆن بەرمیل کەمیکردووە؛ نزمترین ئاست لە دوو ساڵدا

نزمترین ئاست لە دوای 2018؛ یەدەگی نەوتی جیهان ڕۆژانە 4.8 ملیۆن بەرمیل کەم دەکات

ئاژانسی نێودەوڵەتیی وزە: گەورەترین پڕۆسەی ڕاکێشانی یەدەگی نەوت لە مێژوودا ئەنجام دەدەین

سێگۆشەی نەوتی ئەمریکا لە ڤەنزوێلا؛ پلانێک بۆ کۆنترۆڵکردنەوەی گەورەترین یەدەگی جیهان