حیزبی دیموکرات: ئێران بە درۆن کەمپی خێزانەکانمان لە هەولێر بۆردومان کرد

پووختەی هەواڵەکە:

کۆماری ئیسلامی ئێران بە 3 درۆنی بۆمبڕێژکراو بنکە و بارەگاکانی حیزبی دیموکراتی لە هەولێر و بالیسان کردە ئامانج.

هێرشەکان کەمپی جێژنیکانی گرتووەتەوە کە شوێنی نیشتەجێبوونی بنەماڵە و خێزانەکانی ئەو حیزبەیە.

هێزەکانی هاوپەیمانان 10 درۆنی دیکەیان لە ئاسمانی هەولێر بەرپەرچ داوەتەوە و تێکیانشکاندوون.

سوپای پاسداران ڕایگەیاندووە کە ئەم هێرشانە وەک وەڵامێکە بۆ بۆردومانەکانی ئەمریکا لەناو خاکی ئێران.

سوپای پاسدارانی ئێران لە هێرشێکی چڕی بەرەبەیاندا، بەرزاییەکانی بالیسان و کەمپێکی پڕ لە خێزانی لە نزیک هەولێر بۆردومان کردووە، ئەمەش هاوکاتە لەگەڵ تێکشکاندنی چەندین درۆنی دیکە لەلایەن هاوپەیمانانەوە.

هەڵوێستی حیزبی دیموکراتی کوردستانی ئێران:

حیزبی دیموکراتی کوردستانی ئێران ڕایگەیاند، بەرەبەیانی ئەمڕۆ 2ـی ئەیلوولی 2026 لە کاتژمێر 2:00 بۆ 2:40 بە سێ درۆن کراونەتە ئامانج.

بەپێی ڕاگەیەندراوی حیزبەکە، بەرزاییەکانی بالیسان و کەمپی جێژنیکان کە شوێنی نیشتەجێبوونی بنەماڵەکانە، بۆردومان کراون.

تاوەکو ئێستا حیزبەکە هیچ ئامارێکی لەبارەی زیانە گیانی و ماددییەکانی ئەم هێرشە درۆنییانە بڵاونەکردووەتەوە.

هەڵوێستی لایەنی ئەمنی و هاوپەیمانان:

دژەتیرۆری کوردستان لە ڕاگەیەندراوێکدا جەختی کردەوە کە لە کاتژمێر 01:13 تاوەکو 03:31ـی بەرەبەیان، هێزەکانی هاوپەیمانان 10 درۆنی بۆمبڕێژکراویان لە ئاسمانی هەولێر خستووەتە خوارەوە. هێرشەکان هیچ زیانێکی گیانییان لێ نەکەوتووەتەوە و پاشماوەی درۆنەکان لە ناوچە چۆڵەوانییەکان کەوتوونەتە خوارەوە.

ئەم ئاڵۆزییانە دوای ئەوە دێت کە سوپای پاسدارانی ئێران ڕایگەیاند، لە کاردانەوەی هێرشەکانی ئەمریکا بۆ سەر خاکی وڵاتەکەیان، بەرژەوەندییەکانی واشنتن لە هەولێر و چەند وڵاتێکی عەرەبی دەکەنە ئامانج. هێرشەکانی سەر بنکەکانی حیزبی دیموکراتیش وەک بەشێک لەو ئۆپەراسیۆنە سەربازییەی تاران لە سنووری پارێزگای هەولێر لێکدەدرێتەوە.

زانیاریی زیاتر بۆ تۆ

حیزبی دیموکرات: لە 24 کاتژمێردا 5 هێرشی درۆنی کراوەتە سەر بنکەکانمان

لە هێرشێکى درۆنیدا چوار پێشمەرگەی حیزبی دیموکرات شەهید بوون

قایمقامی کۆیە: بە 3 درۆن هێرشکراوەتە سەر بنکەکانی حیزبی دیموکرات لە کۆیە