وەزارەتی دارایی ڕێنمایی نوێی مۆڵەتی بێمووچەی فەرمانبەرانی دەرکرد

پووختەی هەواڵەکە:

وەزارەتی دارایی ڕێنمایی ژمارە 5ـی بۆ جێبەجێکردنی مۆڵەتی بێ مووچە دەرکرد.

ماوەی مۆڵەتی بێ مووچە لە پێنج ساڵەوە بۆ دوو ساڵ کەمکرایەوە.

ماوەی مۆڵەتە دوو ساڵییەکە بە خزمەت و خانەنشینی بۆ فەرمانبەر هەژمار ناکرێت.

ئەوانەی پێشتر مۆڵەتی پێنج ساڵەیان وەرگرتووە بڕیارە نوێیەکە نایانگرێتەوە.

وەزارەتی دارایی دوای مانگێک لە بڕیارەکەی ئەنجوومەنی وەزیران، ڕێنمایی نوێی بۆ سنووردارکردنی مۆڵەتی فەرمانبەران دەرکردووە؛ بەپێی ڕێنماییەکە، مۆڵەتی بێ مووچە لە 5 ساڵەوە بۆ تەنیا 2 ساڵ کورتکراوەتەوە و دەسەڵاتی پەسەندکردنی دراوەتە وەزیر و سەرۆکی دەستەکان لە کاتێکدا ئەو ماوەیە لە خزمەتی خانەنشینی دەسڕدرێتەوە.

وەزارەتی دارایی و ئابووری لە ڕێنمایی ژمارە 5ـی ساڵی 2026 ئەم مەرجانەی دیاریکردووە:

سنووردارکردنی ماوەی مۆڵەتی ئاسایی بێ مووچە بۆ تەنیا 2 ساڵ و ڕێگریکردن لە تێپەڕاندنی ئەو وادەیە.

هەژمارنەکردنی ماوەی ئەو 2 ساڵە وەک خزمەتی وەزیفی یاخود مافی خانەنشینی بۆ فەرمانبەر لە کەرتی گشتیدا.

بەخشینی دەسەڵاتی پێدانی مۆڵەتەکە بە وەزیرەکان و سەرۆکی ئەو دەستانەی بە وەزارەتەوە نەبەستراون.

جێبەجێکردنی بڕیاری ژمارە 300ـی ئەنجوومەنی وەزیران کە لە 6ی ئابی ئەمساڵدا پەسەندکرابوو.

ڕێنماییە کۆنەکان:

ڕێنماییەکە پارێزبەندی بۆ ئەو فەرمانبەرانە داناوە کە پێش دەرچوونی بڕیارەکە مۆڵەتی بێ مووچەی 5 ساڵەیان وەرگرتووە؛ بە جۆرێک تا کۆتاییهاتنی وادەکەیان لە مۆڵەتەکەیان بەردەوام دەبن بەڵام مافی نوێکردنەوەیان نابێت، هاوکات کارکردن بە 11 ڕێنمایی دارایی پێشوو لە ساڵانی 2015 تاوەکو 2022 بە تەواوی هەڵوەشێندراوەتەوە و بڕیارە نوێیەکەش لە ڕۆژی بڵاوبوونەوەی لە ڕۆژنامەی فەرمیی "وەقایعی کوردستان" دەچێتە بواری جێبەجێکردنەوە.

زانیاریی زیاتر بۆ تۆ:

جیاوازییەکانی پێدانی مۆڵەتی درێژخایەن لە نێوان هەولێر و بەغداد

ئەنجوومەنی وەزیرانی هەرێمی کوردستان: مۆڵەتی بێ مووچە تەنیا بۆ دووساڵە