نرخى گالۆنى سووتەمەنى لە ئەمریکا چارەنووسی هەڵبژاردنەکان یەکلایی دەکەنەوە

پووختەى ستۆرییەکە

لەگەڵ لێکتێگەیشتن و نزیکبوونەوە لە بەڕێوەچوونی هەڵبژاردنەکانی نیوەی خول لە ئەمریکا، تەواوی 435 کورسییەکەی ئەنجوومەنی نوێنەران و 35 کورسیی ئەنجوومەنی پیران دەکەونە بەر کێبڕکێیەکی تووندەوە.
ئەم هەڵبژاردنە بە یەکێک لە یەکلایکەرەوەترین خولەکانی ململانێی سیاسی ئەمریکا دادەنرێت، چونکە ڕاستەوخۆ هاوسەنگیی دەسەڵات لە واشنتن دیاری دەکات.

بە گوێرەى دواین ڕاپرسییە گشتییەکان، توانای کڕین و بەرزبوونەوەی تێچووی ژیان بووەتە بابەتی یەکەم و گەرم بۆ دەنگدەرانی ئەمریکی، بەگوێرەى ئامارەکانى بەشێک لە میدیاکانى ئەمریکا، زیاتر لە 80%ـی هاوڵاتییان ڕایانگەیاندووە، نرخی بەنزین و کەمبوونەوەى داهات، سەرەکیترین بابەتەکانن کە کاریگەرییان لەسەر دادەنێن لەکاتى چوونیان بۆسەر سندوقەکانی دەنگداندا.

بەرزبوونەوەى نرخەکان

بەرزبوونەوەی بەرچاوی نرخی سووتەمەنی بە ڕێژەی نزیکەی 30% و گەیشتنی ڕێژەی سوود بۆ دەوروبەری 7%، گوشارێکی بێپێشینەی خستووەتە سەر خێزانە مامناوەندەکان.
ئەم پرسەش ڕاستەوخۆ کاریگەریی نەرێنی لەسەر پێگەی پارتی دەسەڵاتدار دروستکردووە.
هەر ئەمەش نییە کە وایکردووە هاوڵاتییانى ئەمریکا لەسەر پرسی هەڵبژاردنەکان ڕاى جیاوازیان هەبێت.
ئەوانەى بابەتە ئابوورییەکە کاریگەرى لەسەر دانەناون پرسی جەنگ شوێنى گرتووەتەوە و دەیانەوێت وڵاتەکەیان بەدوور بێت لە ئاڵۆزییە سەربازییەکان.
بەردەوامیی قەیرانە سەربازییەکان لە ڕۆژهەڵاتی ناوەڕاست و هێرشە نێودەوڵەتییەکان بوونەتە هۆی ناڕەزایەتییەکی فراوان لە شەقامی ئەمریکا.
تەرخانکردنى هاوکارییە سەربازییەکان کە بە میلیارەها دۆلارە، لە کاتێکدا ئابووری ناوخۆ ڕووبەڕووی ئاڵۆزی بووەتەوە، بووەتە چەکێکی بەهێز لە دەستی بەربژێرە دیموکراتەکان بۆ ڕەخنەگرتن لە سیاسەتی دەرەوەی ئیدارەی ئێستا.
عەبدوللـەتیف ئەلسەید، بەربژێری دیاری دیموکراتەکان بۆ ئەنجوومەنی پیران لە ویلایەتی میشیگن، دەڵێت، هاوڵاتییانی ئەمریکا ناتوانن لە یەک کاتدا باجی جەنگە بێکۆتاکانی دەرەوە و گرانبوونی نرخی بەنزین و بژێویی ڕۆژانەیان بدەن.
دەشڵێت، ئێستا کاتی ئەوە هاتووە خۆیان لە تێوەگلانە دەرەکییەکان بپارێزن و بژێویی خەڵک بخەنە پێش ئۆپراسیۆنە سەربازییەکانەوە.
کۆمارییەکان ڕاى دیکەیان هەیە و وەڵامى ئەوان بەجۆرێکى دیکەیە.
لە بەرامبەر قسەکانى ئەلسەید، مایک ڕۆجەرز بەربژێرى کۆمارییەکان لە ویلایەتی میشیگن و ئەندامی پێشووی کۆنگرێس، بەهۆی ناڕەزایەتیی شەقامەوە هەڵوێستی بەرامبەر ئاڵۆزییە نێودەوڵەتییەکان نەرمتر کردووەتەوەو دەڵێت، پێویستە سەقامگیری بگێڕینەوە بۆ بازاڕەکانی وزە.
ئاماژە بەوەش دەکات، ئەگەر نەتوانن کۆنتڕۆڵی ئاسایشی سنوور و نرخی سووتەمەنی بکەن، توانای پاراستنی بەرژەوەندییە گشتییەکان لەدەست دەدەن.

ترەمپ لەمبارەوە چى دەڵێت؟

ئەوەى ئێستا بووەتە جێگاى ڕەخنەى سەرەکى، دۆناڵد ترەمپە، ئەویش لە زۆربەى وتار و دیمانەکانیدا جەخت لەوە دەکاتەوە، کە بەرزبوونەوەی نرخەکان و تەنگژەی سووتەمەنی ئاماژەی خاوکردنەوەی بەرهەمهێنانی ناوخۆیین.

بۆچوونى ناوەندە فەرمییەکانى ناوخۆى ئەمریکا

بەڵام ئامار و پێشبینییەکان و ڕاپرسیەکان ژمارەى دیکە دەڵێن، کە دیارترین ناوەندەکانی شیکاریی سیاسی وەک کووک پۆلەتیکاڵ ڕیپۆرت و ساباتۆس کریستاڵ بۆڵ، ئاماژە بەوە دەکەن، بەهۆی خراپى و ناڕەزایی لە دۆخى ئابوورییەوە، دیموکراتەکان هەلێکی بەهێزیان لەبەردەمدایە، بۆ گۆڕانکارى لە ژمارەى کورسییەکانى ئەنجوومەنى نوێنەران و ئەنجوومەنى پیران.

پێشبینییە بەرچاوەکان دەریانخستووە، دیموکراتەکان چانسی زۆریان هەیە بۆ بەدەستهێنانەوەی زۆرینەی ئەنجوومەنی نوێنەران، کە تەنیا پێویستیان بە بەدەستهێنانی سێ کورسی زیاترە. هەرچى ئەنجوومەنی پیرانە کێبڕکێکە زۆر قورسە و نزیکە لە یەکترەوە، چونکە کۆمارییەکان لە ئێستادا زۆرینەی 53 بە 47 پێکدەهێنن. بەڵام ئەمەش بەدەرنییە لە کێبڕکێ و لە ویلایەتەکانی وەک میشیگن، ئایۆوا، جۆرجیا و مەین گەیشتووەتە لوتکە و هەر ڕووداوێکی ئابووریی خێرا دەتوانێت زۆرینەکە ئاڵوگۆڕ پێبکات.

زانیارى زیاتر بۆ تۆ

وەزیری وزەی ئەمریکا: یەک بەرمیل نەوتى ڤەنزوێلا بە 45 دۆلار دەکڕین؛ مادورۆ بە 31 دۆلاری دەفرۆشت

یەدەگی ستراتیژیی نەوتی ئەمریکا بۆ نزمترین ئاستی 44 ساڵی ڕابردوو دابەزی

پەرەسەندنی سەربازیی ئەمریکا و ئێران و هەڵکشانی نرخی نەوت لە جیهان