گرنگە بۆ شۆفێران؛ هاتوچۆ ڕێنمایی نوێ بۆ مۆڵەتی تاکسی و ماتۆڕسکیل بڵاودەکاتەوە
پووختەی هەواڵەکە:
- بەڕێوەبەرایەتیی هاتوچۆ ڕێنمایی نوێی بۆ دەرهێنان و نوێکردنەوەی مۆڵەتی تاکسی بڵاوکردەوە.
- نوێکردنەوەی مۆڵەتی تاکسی مەرجی هێنانی ئەستۆپاکی لە بەڵگەکانی تاوانی بۆ زیادکرا.
- پێشکەشکردنی داواکاری بۆ دەرهێنانی مۆڵەتی شۆفێریی ماتۆڕسکیل ڕێکخرایەوە.
- دوا مۆڵەت بۆ پڕکردنەوەی فۆڕمی مۆڵەتی ماتۆڕسکیل تاوەکو 10/10/2026 دەبێت.
بەڕێوەبەرایەتیی هاتوچۆ کۆمەڵێک ڕێکاری کارگێڕیی نوێی بۆ شۆفێرانی تاکسی و لێخوڕانی ماتۆڕسکیل دەرکردووە، بە جۆرێک نوێکردنەوەی مۆڵەتی تاکسی بە وەرگرتنی پشتگیریی بەڵگەکانی تاوانەوە دەبەستێتەوە، هاوکات وادەیەکی دیاریکراویش بۆ مامەڵەی مۆڵەتی ماتۆڕسکیل دادەنێت.
ڕێکارەکانی بەشی مۆڵەت بۆ شۆفێرانی تاکسی:
- بەشی مۆڵەت لە بەڕێوەبەرایەتیی هاتوچۆ شۆفێرانی تاکسی ئاگادار دەکاتەوە:
- لەکاتی نوێکردنەوەی مۆڵەتدا، پێویستە دوای تەواوکردنی لیژنەی پزیشکی ڕاستەوخۆ سەردانی بەڕێوەبەرایەتیی هاتوچۆ بکرێت.
- لە هاتوچۆ نووسراوی فەرمی بۆ شۆفێر دەکرێت بۆ بەڕێوەبەرایەتیی بەڵگەکانی تاوان تا پشتگیریی ئەستۆپاکی بهێنێت.
- ئەو شۆفێرانەی مۆڵەتی تاکسییان نییە و داوای مۆڵەت دەکەن، پێویستە سەرەتا لە بەشی مۆڵەت نووسراویان بۆ لیژنەی پزیشکی بۆ بکرێت.
- پشکنینی پزیشکی بۆ ئەو شۆفێرانە مەرجە بە مەبەستی دڵنیابوونەوە لە شیاویی تەندروستییان بۆ لێخوڕینی تاکسی.
ڕێکارەکانی تایبەت بە مۆڵەتی ماتۆڕسکیل:
لە تەوەرێکی دیکەی ڕێنماییەکاندا، بەڕێوەبەرایەتیی هاتوچۆ مەرجەکانی بۆ خوازیارانی دەرهێنانی مۆڵەتی ماتۆڕسکیل ڕاگەیاندووە؛ بەگوێرەی بڕیارەکە پێویستە سەرەتا داواکار سەردانی بەشی مۆڵەت بکات بۆ پڕکردنەوەی فۆڕم و ئاراستەکردنی بۆ لیژنەی پزیشکی، هاوکات دوا وادەش بۆ پڕکردنەوەی فۆڕمی پێدانی مۆڵەتی ماتۆڕسکیل تاوەکو 10/10/2026 دیاریکراوە.
پێشینە و ئامانجی ڕێکارە کارگێڕییەکان:
ئەم بڕیارانەی هاتوچۆ لە چوارچێوەی ڕێکخستنەوەی کەرتی گواستنەوەی گشتی و کۆنترۆڵکردنی دیاردەی لێخوڕینی ماتۆڕسکیلە لەسەر شەقامەکان؛ داواکردنی پشکنینی بەڵگەکانی تاوانیش بۆ شۆفێرانی تاکسی لە پێناو سەلامەتیی هاووڵاتییان و دڵنیابوونەوەیە لە نەبوونی تۆماری تاوان لەسەر ئەو کەسانەی لە کەرتی گواستنەوەدا کار دەکەن.
زانیاریی زیاتر بۆ تۆ:
لە هەولێر و دهۆک ساڵانەى ئۆتۆمبێل بە دیجیتاڵى کرا
بەشى مۆڵەت لە هاتوچۆى سلێمانى لە شەفتى ئێوارانیش دەوام دەکات
19 خولەک پێش ئێستا