نزار ئامێدی: پاراستنی شکۆی ڕزگاربووانى دەستى داعش بەرپرسیارێتییەکی نیشتمانییه
پووختەی هەواڵ
- کۆبوونەوە لەگەڵ شاندێکی ژنانی ڕزگاربووی پێکهاتەکان
- تاوتوێکردنی دۆخی گوزەرانیان و دەستبەرکردنی مافەکانیان
- پێشتگیری و دووبارە تێکەڵکردنەوەیان بە کۆمەڵگە
زانیارییەک گەیشتووە بە کەناڵ8، سەرۆککۆمارى عێراق، ڕایگەیاندووە، سزادانى باندە تیرۆریستییەکانی داعش و ڕاپێچکردنیان بۆ بەردەم دادگا و پاراستنی شکۆی ڕزگاربووانى دەستى داعشیش ئەرکێکی نیشتمانی و ئەخلاقییە.
نزار ئامێدی، سەرۆککۆمارى عێراق، لە کۆشکی سەلام لە بەغداد، لەگەڵ شاندێکى ژنانى ڕزگاربووی پێکهاتەکانى ئێزدی، کریستیان، تورکمان و شەبەک کۆبووەوە و تاوتوێى دۆخی گوزەرانیان و چۆنیەتی دەستەبەرکردنی مافەکانیان، بەمەبەستى دابینکردنی پشتگیریی پێویست بۆ دووبارە تێکەڵبوونەوەیان بە کۆمەڵگە کرد.
پشتیوانی سەرۆککۆمار
- مامەڵەکردنی دادپەروەرانە لەگەڵ ڕزگاربووەکان
- پاراستنی کەرامەتی ڕزگاربوان
- چاودێریکردن و پشتیوانیکردنیان
- دابینکردنی پێداویستییەکانیان لە هەموو بوارەکاندا
نزار ئامێدی، ڕایگەیاند، دادپەروەرانە مامەڵەکردن لەگەڵ ڕزگاربووان و پاراستنی کەرامەتیان، بەرپرسیارێتییەکی نیشتمانییە و ئاماژەشی بە گرنگیی بەردەوامبوونی چاودێری و پشتیوانیکردنیان و دابینکردنی پێداویستییە کۆمەڵایەتی، تەندروستی، ئابووری و دەروونییەکانیان کرد.
پابەندبوونی دەوڵەت
هەروەها جەختی لە پێویستی جێبەجێکردنی ئەو ڕێسا و یاسایانە کردەوە کە مافەکانیان دەپارێزن و دادپەروەری دەچەسپێنن، بە شێوەیەک کە پابەندبوونی دەوڵەت بە پاراستنی هەموو پێکهاتەکان و شکۆمەندییان ڕەنگ بداتەوە.
گوتیشى، تاوانەکانی باندە تیرۆریستییەکانی داعش دژی ئێزدییەکان، کریستیان، تورکمان، شەبەک و هەموو پێکهاتەکانی دیکەی عێراق، بە تێپەڕبوونی کات لەبیر ناچن و سزادانی تاوانباران و ڕاپێچکردنیان بۆ بەردەم دادگا، ئەرکێکی نیشتمانی و ئەخلاقییە.
زانیاری زیاتر بۆ تۆ
https://channel8.com/kurdish/news/39724
https://channel8.com/kurdish/news/162883
2 کاتژمێر پێش ئێستا