گۆڕانی کەشوهەوا ڕەنگی دەریاچەی ورمێی کردووە بە سوور و پەمیی
پووختەی هەواڵەکە
- بەهۆی گۆڕانکارییە وەرزییەکان و زۆربوونی ڕێژەی بەهەڵمبوون، ڕەنگی ئاوی دەریاچەی ورمێ لە ڕۆژهەڵاتی کوردستان گۆڕاوە بۆ سوور و پەمەیی.
- بەڕێوەبەری ژینگەی ورمێ ڕایگەیاندووە ڕووداوەکە سروشتییە و بەهۆی چڕبوونی خوێ و چالاکیی هەندێک زیندەوەرەوە ڕەنگی ئاوەکە گۆڕاوە.
- شارەزایان دروستبوونی قەوزە و بوونەوەری ئارتیما بە هۆکاری سەرەکیی گۆڕانی ڕەنگی دەریاچەکە دەزانن و ساڵانە لە وەرزی گەرمادا ئەم دیاردەیە ڕوودەدات.
بەگوێرەی ئەو زانیارییانەی گەیشتوون بە کەناڵ8 ، بەهۆی گۆڕانکارییە وەرزییەکان، زۆربوونی ڕێژەی بەهەڵمبوون و کەمبوونەوەی ئاستی ئاو لە دەریاچەی ورمێ لە پارێزگای ورمێی ڕۆژهەڵاتی کوردستان، ڕەنگی ئاوی دەریاچەکە گۆڕاوە بۆ سوور و پەمەیی.
هۆکارەکانی گۆڕانی ڕەنگی ئاوی دەریاچەی ورمێ
- حوجەت جەباری، بەڕێوەبەری ژینگەی ورمێ ڕایگەیاندووە ڕووداوەکە سروشتییە و بەهۆی کەمبوونەوەی ئاستی ئاو و زیادبوونی کرداری بەهەڵمبوون ڕوویداوە.
- چڕیی خوێ لە هەندێک بەشی دەریاچەکە زیاد دەکات و بەوەش هەندێک زیندەوەر دەبنە هۆکار بۆ گۆڕانی ڕەنگی ئاوەکە.
- بەڕێوەبەری ژینگەی ورمێ ئاماژەی بەوە کردووە لێکۆڵینەوەکان لە هۆکاری ڕەنگگرتنی ئاوەکە بەردەوامن و ساڵانە شاهێدی بینینی دیمەنی لەو جۆرەن.
- بەگوێرەی بەرپرسانی ژینگەی پارێزگاکە، ڕێژەی سوێری لە دەریاچەکە لە هەر لیترێکدا 330 گرامە و وادەکات گیا و گیانلەبەرەکانی دەوربەری ڕەنگیان بۆ سوور بگۆڕێت.
تێڕوانینی شارەزایان و تایبەتمەندییەکانی دەریاچەکە
ساڵانە چەندین لێکۆڵینەوە لەسەر دەریاچەکە کراوە و شارەزایان سوێربوونی لەڕادەبەدەری ئاوەکە، دروستبوونی قەوزە و هاتنی بەکۆمەڵی بوونەوەرێک بەناوی ئارتیما، کە بە ئاڵتوونی سووری ئێران ناسراوە، بە هۆکاری سەرەکیی گۆڕانی ڕەنگەکەی دەزانن؛ بەم هۆیەوە لە وەرزی گەرمادا دەریاچەی ورمێ دەبێتە جێگای سەرنجی ئاژانس و میدیا جیهانییەکان.
زانیاریی زیاتر لەسەر بابەتەکە
دەریاچەی ورمێ یەکێکە لە گەورەترین دەریاچە سوێرەکانی ڕۆژهەڵاتی ناوەڕاست، پێشتر ڕووبەری دەریاچەکە 5 هەزار و 200 کیلۆمەتر چوارگۆشە بووە، بەڵام لە ساڵی 2022وە 80%ـی ئاوەکەی کەمیکردووە.
زانیاریی زیاتر بۆ تۆ
هەفتە بازاڕی بۆکان بووەتە ناوەندێکی گەورەی بازرگانی پارێزگای ورمێی ڕۆژهەڵاتی کوردستان
ورمێ؛ گەورەترین دەریاچەی ئاوی سوێر لە رۆژهەڵاتی ناوەڕاست بەرەو وشكبوون دەڕوات
2 کاتژمێر پێش ئێستا