ئاگرەکەی چیای ئەزمڕ کۆنتڕۆڵ کرا
کەناڵ8 2 کاتژمێر پێش ئێستا
پووختەی هەواڵەکە:
- شەوی ڕابردوو ئاگرێکی بەرفراوان لە چیای ئەزمڕ لە دیوی سیتەک و شارباژێڕ کەوتەوە.
- تیمەکانی بەرگریی شارستانی و خۆبەخشان توانییان دوای دوو کاتژمێر ئاگرەکە کۆنتڕۆڵ بکەن.
- بوونی کێڵگەی مین و بای بەهێز ڕێگر بوون لە خێرا کوژاندنەوەی بڵێسەکان.
- ڕووداوەکە بەهۆی شۆرتی کارەباوە بووە و زیاتر لە 100 دۆنم زەوی سووتاوە.
زانیارییەک گەیشتووەتە بە کەناڵ8 کە نیشانی دەدات ئاگرێکی بەرفراوان لە سنووری گوندەکانی خەمزە و قولەڕەش بەهۆی پچڕانی تەلی کارەباوە هەڵگیرساوە و بەهۆی ڕەشەبای توندەوە بە خێرایی تەشەنەی سەندووە بۆ ناوچە شاخاوییەکان، کە نزیکەی کاتژمێر 10:10ی شەو دەستیپێکرد و لە کاتژمێر 12:20ی بەرەبەیان کۆنتڕۆڵ کرا.
بەرگریی شارستانی و لایەنە ئیدارییەکان:
- فازڵ عومەر، قایمقامی سلێمانی ڕایگەیاند ئاگرەکە کۆنتڕۆڵ کراوە، بەڵام تیمەکان بۆ ڕێگری لە سەرهەڵدانەوەی بڵێسەکان لە شوێنەکە ماونەتەوە.
- فەرهاد ساڵح، قایمقامی شارباژێڕ ئاماژەی بەوە کرد کە بوونی کێڵگەی مین ئەرکی تیمەکانی قورس کردبوو و پڕۆسەی کوژاندنەوەی خاو کردبووەوە.
- 10 تیمی جیاواز لە بەرگریی شارستانیی سلێمانی، سیتەک، شارباژێڕ، پۆلیسی دارستان و بەرگریی فریاکەوتن لە پڕۆسەکەدا بەشدار بوون.
- هۆکاری ڕووداوەکە بۆ شۆرتی کارەبا و پچڕانی یەکێک لە تەلی ستوونەکانی گواستنەوەی وزە لە ناوچەکە گەڕێندراوەتەوە.
زیانە گیانی و ماددییەکان:
لە کاتی کوژاندنەوەی ئاگرەکەدا، کەسێکی خۆبەخش لە تیمی سیتەک بە سووکی بریندار بووە و ئێستا تەندروستی جێگیرە. سەبارەت بە زیانە ژینگەییەکان، خەمڵاندنە سەرەتاییەکان ئاماژە بە سووتانی زیاتر لە 100 دۆنم لە پوش، پاوان و دارستانی سروشتیی ناوچەکە دەکەن.
زانیاری زیاتر بۆ تۆ
قایمقامیەتی سلێمانی کۆمەڵێک ڕێکاری توند بۆ ڕێگری لە ئاگرکەوتنەوە لە گۆیژە و ئەزمەڕ ڕادەگەیێنێت
بەرزبوونەوەی پلەکانی گەرما بووەتە هۆی کەوتنەوەی 5 ئاگر لە یۆنان
کەناڵ8
2 کاتژمێر پێش ئێستا