هەرێمی کوردستان لە پێنج بەرهەمی سەرەکی گەیشتە خۆبژێوی

پووختەی هەواڵەکە:

هەرێمی کوردستان لە بەرهەمەکانی پەتاتە، گەنم، مریشک، هێلکە و سەوزە گەیشتووەتە ئاستی خۆبژێوی.

ساڵانە بڕی 2.3 ملیار هێلکە و 250,000 تۆن گۆشتی مریشکی زیادە ڕەوانەی عێراق دەکرێت.

بەرهەمهێنانی پەتاتە گەیشتووەتە 1,000,000 تۆن کە سێ هێندەی پێداویستیی ناوخۆی هەرێمی کوردستانە.

لە بەرهەمەکانی هەنگوین، شیر و قارچکدا ڕێژەی خۆبژێوی گەیشتووەتە 70% و هەنگاو بۆ تەواوکردنیان دەنرێت.

هەرێمی کوردستان لە ئێستادا وەک سەبەتەی خۆراک بۆ عێراق کار دەکات و بەشێکی زۆری بەرهەمە کشتوکاڵییە زیادەکانی ڕەوانەی پارێزگاکانی ناوەڕاست و خواروو دەکات. ئەم گەشەسەندنە دوای پلانەکانی وەزارەتی کشتوکاڵ دێت بۆ یەکخستنی پڕۆژە ستراتیژییەکان و پاڵپشتیکردنی کەرتی تایبەت. ئێستا بەشێک لە بەرهەمە خۆماڵییەکان، وەک هەنگوین و پەتاتە، ڕێگەی هەناردەکردنیان بۆ وڵاتانی کەنداو و بازاڕە جیهانییەکان بۆ کراوەتەوە.

ئاستی بەرهەمهێنان بەگوێرەی وەزارەتی کشتوکاڵ:

ساڵانە 1,000,000 تۆن پەتاتە بەرهەمدێت، لە کاتێکدا پێداویستی ناوخۆ تەنها 300,000 تۆنە و بڕی 700,000 تۆن ڕەوانەی عێراق دەکرێت.

بەرهەمهێنانی ساڵانەی گۆشتی مریشک زیاتر لە 400,000 تۆنە، کە تەنها 150,000 بۆ 170,000 تۆنی لە ناوخۆدا بەکاردێت.

لە ڕێگەی 59 پڕۆژەوە، 4.4 ملیار هێلکە بەرهەمدێت و 2.3 ملیار هێلکەی بۆ پارێزگاکانی عێراق ڕەوانە دەکرێت.

ساڵانە 2,000,000 تۆن سەوزەوات بەرهەمدێت و خواستێکی زۆر لەسەر جۆرە جیاوازەکانی لە بازاڕەکانی ناوەڕاست و خوارووی عێراقدا هەیە.

بەرهەمهێنانی گەنم گەیشتووەتە ئاستی خۆبژێوی کە ساڵانە پێویستی بە 1,000,000 تۆن گەنم هەیە بۆ دابینکردنی ئاردی ناوخۆ.

بەرهەمەکانی قۆناغی دووەمی خۆبژێوی:

وەزارەتی کشتوکاڵ ئاشکرای کردووە کە لە سێ بەرهەمی دیکەدا گەیشتوونەتە ئاستی 70%ـی خۆبژێوی. ئاستی بەرهەمهێنانی ئەم بەروبوومانە بەم شێوەیەیە:

بەرهەمی هەنگوین گەیشتووەتە 500 بۆ 600 تۆن و بەشێکی ڕەوانەی بازاڕەکانی ئیمارات دەکرێت.

ئاستی بەرهەمهێنانی شیر لە سەروو 300,000,000 لیترە، لە کاتێکدا پێداویستی ساڵانە 480,000,000 لیترە.

ساڵانە 3,000 تۆن قارچک بەرهەمدێت و هەماهەنگی کراوە بۆ بەکارهێنانی لە پڕۆژە خۆراکییەکاندا.

حکومەتی هەرێمی کوردستان پلانێکی لەگەڵ ڕێکخراوی فاو جێبەجێ دەکات بۆ بونیادنانی سەنتەری کۆکردنەوەی شیر و بونیادنانی کارگەی گەورە تاوەکو گەیشتن بە خۆبژێویی تەواوەتی لە هەموو سێکتەرەکاندا.

زانیاری زیاتر بۆ تۆ

میدیا و زانیاری: وەبەرهێنانی کشتوکاڵی گەیشتە %12 و هەرێم بەرەو خۆبژێوی هەنگاوی گەورە دەنێت

هەرێمى کوردستان لە 5 بەرهەمى سەرەکى خۆبژێوى بەدەستهێناوە

بەرهەمی شیر 77% زیادی کردووە؛ پلانی "خۆبژێوی" بۆ ساڵی 2030 دانراوە

بەڕێوەبەری گشتیی کۆمپانیای بازرگانیی دانەوێڵە: عێراق لە بەرهەمهێنانی ئاردی سفر گەیشتە خۆبژێوی