جارێکى دیکە کێشەى کەمى بەنزین لە عێراق سەرهەڵدەداتەوە

پووختەى ڕاپۆرتەکە

جارێکى دیکە کێشەى کەمى بەنزین لە عێراق سەرهەڵدەداتەوە.
وەزارەتى نەوتى عێراق لە بارەى کەمى بەنزین ڕوونکردنەوە دەدات.
سەلیم ڕکابى: درەنگ گەیشتنى کەشتییەکان هۆکارى قەیرانى بەنزینە.
ڕوانگەى ئابووریى عێراق: عێراق ڕۆژانە 4-5 ملیۆن لیتر بەنزین کورتهێنانى هەیە.
بەرهەمى ڕۆژانەى بەنزین لە عێراق 29 ملیۆن لیترە.
پێداویستیی ڕۆژانەى عێراق 33 ملیۆن لیتر بەنزینە.

لە دوێنێ ڕۆژى پێنجشەممە، 3ـى ئەیلوول، کێشەى کەمى بەنزین بەغداد و پارێزگاکانى دیکەى عێراقى گرتووەتەوە، چەندین بەنزینخانە بەهۆى نەمانى بەنزینەوە داخراون.

هۆکارەکانى قەیرانى بەنزین لە عێراق

ڕوانگەى ئابووریی عێراق، بڵاویکردووەتەوە، قەیرانى بەنزین لە بەغداد و چەند پارێزگایەکى دیکە بەردەوام دەبێت، تاوەکو ئەو کاتەى کاروانە هاوردەکراوەکان دەگەن.
عێراق ناتوانێت بەرهەمهێنان زیاد بکات، بەهۆى سنوورداریی تواناى کۆگاکردنى بەرهەمە نەوتییەکانى دیکە.
عێراق ڕۆژانە29 ملیۆن لیتر بەنزین لە پاڵاوگەکان بەرهەمدەهێنێت، بەڵام بەکاربردنى ڕۆژانە زیاترە لە33 ملیۆن لیتر کە %18ـى موحەسەن و سوپەرە.
ڕوانگەى ئابووریی عێراق: کورتهێنانى ڕۆژانەى بەنزین دەگاتە چوار بۆ پێنج ملیۆن لیتر و بە هاوردەکردن پڕدەکرێتەوە.
دواکەوتنى کاروانەکانى بەنزینى هاوردەکراو، هۆکارى سەرەکى قەیرانى ئێستاى بەنزینە لە بەغداد و پارێزگاکانى دیکە.
سەلیم ڕکابى، گوتەبێژى وەزارەتى نەوت لە ڕاگەیێنراوێکدا بۆ ڕایگشتى هۆکارى سەرهەڵدانى کەمى بەنزینى گەڕاندووەتەوە بۆ جیاوازى لە بەرهەم و بەکاربردن، بۆ چارەسەرکردنى ئەو جیاوازییەش پەناى بردووەتە بەر هاوردەکردن.
ڕکابى: ململانێ و ڕووداوەکانى ناوچەکە، گرفتى لۆجستییان بۆ جوڵەى کەشتییەکان دروستکردووە و وایکردووە، کەشتییەکان درەنگ بگەنە بەندەرەکانى عێراق.
بەهۆى خراپى دۆخى ئەمنیى ناوچەکەوە، وەزارەتەکەیان توانیوویەتى تەنیا گرێبەست لەگەڵ یەک کەشتی بکات، پڕۆسەى بەتاڵکردن و گەڕانەوەى بۆ بارکردنى بارێکى دیکە و دووبارە گەڕانەوەى بۆ بەندەرەکانى عێراق، کاتى دەوێت، ئەوەش هۆکار بووە بۆ دابینکردنى بەنزین بۆ بەنزینخانەکان.
وەک ڕکابى گوتوویەتى، وەزارەتەکەیان پلانى داناوە زیاتر لە کەشتییەک بەکرێ بگرێت، تاوەکو دەرفەتى زیاترى هەبێت بۆ دابینکردنى پێداویستییەکانى ڕۆژانە لە بەرهەمە نەوتییەکان و بەهێزکردنى کۆگاى ستراتیژى.

ئەوە لە کاتێکدایە، بەهۆى جەنگى نێوان ئەمریکا و ئێران و داخستنی گەرووی هورمز کاریگەرییەکی توند و ڕاستەوخۆی لەسەر ئابووری و هەناردەی نەوتی عێراق هەبوە، چونکە نزیکەی 95%ـی نەوتی خاوی عێراق پێش قەیرانەکە لە ڕێگەی بەندەرەکانی باشوور (بەسرە) و ئەم گەرووە ئاوییەوە هەناردەی بازاڕەکانی جیهان دەکرا.

زانیارى زیاتر بۆ تۆ

وەزارەتى نەوتى عێراق بۆ کەناڵ8: بەنزینى پێویست بۆ بەکارهێنانى هاوڵاتیان فەراهەم کراوە

سەرۆکوەزیران کۆبوونەوەیەکى فراوانى لەگەڵ وەزارەتى نەوت کرد

لە عێراقەوە هەوڵەکان بۆ دابینکردنى بەنزینى پاڵپشتیکراو بۆ هەرێمى کوردستان بەردەوامن