پووختەی هەواڵەکە

• دۆسیەی گیانلەدەستدانی سارا تەحسین یاسینی تەمەن 21 ساڵ لەکاتى نەشتەرگەریدا لە نەخۆشخانەیەکی تایبەتی هەولێر ڕەوانەی دادگا کرا.

• وەزارەتی تەندروستی تەواوی بەرپرسانی ڕووداوەکەی ڕەوانەی دادگا کردووە و چاوەڕوان دەکرێت لە ڕۆژانی داهاتوودا گوتەیان لێوەربگیرێت.

• سەندیکای پزیشکان لقی هەولێر داوا دەکات لە ڕێگەی لیژنەیەک و تیمی پسپۆڕەوە لێکۆڵینەوە لە مەرجەکانی سەلامەتی نەخۆشخانەکە بکرێت.

---

بەگوێرەی زانیارییەک کە بە کەناڵ8 گەیشتووە، د. ڕەسوڵ عەبدولخالق، سەرۆکی لیژنەی پشکنین و بەدواداچوون لە وەزارەتی تەندروستی ڕایگەیاند، ڕێکاری یاسایی سەبارەت بە گیانلەدەستدانی سارا تەحسین یاسین گگیراوەتەبەر و تەواوی بەرپرسانی ڕووداوەکە و نەخۆشخانەکە ڕەوانەی دادگا کراون تاوەکو دادگای لێکۆڵینەوە بڕیاری پێویستیان لەسەر بدات.

---

ڕێکارە یاساییەکان و پەڕاوی لێکۆڵینەوە

• وەزارەتی تەندروستی لە ڕۆژی چوارشەممەوە ڕێکاری بەرامبەر کەسانی بەرپرس و نەخۆشخانەکە گرتووەتەبەر.

• پزیشکی نەشتەرگەری و پزیشکی سڕکەر و کارگێڕیی نەخۆشخانەکە دراونەتە دادگا.

• دادگای لێکۆڵینەوە لە ڕۆژانی داهاتوودا بانگی تۆمەتباران دەکات و گوتەیان لێوەردەگرێت.

• لقی هەولێری سەندیکای پزیشکان داوا دەکات بە بەشداریی دادگا و پزیشکی دادی لێکۆڵینەوەی ورد لەسەر ڕووداوەکە بکرێت.

هەڵوێستی سەندیکای پزیشکان سەبارەت بە مەرجەکانی سەلامەتی

لقی هەولێری سەندیکای پزیشکانی کوردستان ئاماژەی بەوە کردووە، ئەو پزیشکەی بەرپرسیار بووە لە نەخۆشەکە، هەڵگری بەرزترین بڕوانامەی پسپۆڕییە و ڕێپێدانی دروستی لە سەندیکا هەبووە. هاوکات سەندیکا داوا دەکات لێکۆڵینەوە بکرێت لەوەی بە چ مۆڵەتێک ڕێگە بە نەشتەرگەری دراوە، لەکاتێکدا هۆڵەکانی نەشتەرگەری نەخۆشخانەی ڕەسولی تایبەت داخراو بوون و بەشی چاودێریی چڕ (ICU) لە ژێر نۆژەنکردنەوەدا بووە، تاوەکو دیاری بکرێت ئایا پێداویستییەکانی سەلامەتیی نەخۆش دابین کرابوون یان نا. سەندیکا ڕەخنەشی لە ڕێنمایی حکومەت گرتووە کە پزیشک تەنیا لە یەک نەخۆشخانەی تایبەت کار بکات و بە زیان بەخش بۆ کەرتی تەندروستی و نەخۆش وەسفی کردووە.

زانیاریی زیاتر لەسەر بابەتەکە

سارا تەحسین یاسینی تەمەن 21 ساڵ لە هەفتەی ڕابردوودا لە کاتی ئەنجامدانی نەشتەرگەری لە نەخۆشخانەیەکی تایبەتی شاری هەولێر گیانی لەدەستدا. ڕووداوەکە کاردانەوەی لێکەوتەوە و لەسەر ئاستی وەزارەتی تەندروستی و دادگا و سەندیکای پزیشکان بەدواداچوونی بۆ دەکرێت، تاوەکو هۆکاری ڕاستەقینەی گیانلەدەستدانی و ئاستی پابەندبوونی نەخۆشخانەکە بە مەرجەکانی سەلامەتی یەکلایی بكرێتەوە.

زانیاریی زیاتر بۆ تۆ

سەندیکای پزیشکان: پزیشکەکە بێتاوانە و دەبێت لێکۆڵینەوە لە نەخۆشخانە بکرێت

بەهۆی گیانلەدەستدانی نەخۆشێکەوە نەخۆشخانەیەکى تایبەت لە هەولێر داخرا

تەندروستیی گەرمیان لەسەر گیانلەدەستدانی ژنێک پاش دەرزی لێدانی بەدواداچوون دەکات

تەندروستیی کەرخ ڕوونکردنەوەیەکی لەبارەی گیانلەدەستدانی هاونیشتمانییەکی کورد بڵاوکردەوە

وەزارەتی تەندروستی: ڕێکاری یاسایی بەرامبەر کەمتەرخەمانی شەهیدبوونی غەزال مەولان دەگرینەبەر