مەکتەبی سیاسیی یەکێتیی نیشتمانیی کوردستان رایگەیاند، ئومێدەوارن نەورۆزی ئەمساڵ مژدەی گۆڕانکاریی و ھەڵبژاردن بەدوای خۆیدا بھێنێت و چاویان لەسەرکەوتنێکی گەورەیە تاوەکو رێڕەوی حوکمڕانی راست بکەنەوە.
مەکتەبی سیاسیی یەکێتیی بەبۆنەی نەورۆز و ھاتنی بەھارەوە پەیامێکی بڵاوکردەوە دەڵێت: بە بۆنەی جەژنی نەتەوەیی نەورۆز و ساڵی نوێی کوردی (٢٧٢٤) ، یادی تاجی راپەڕینی رزگاری کەرکوکی قودسی کوردستانەوە پیرۆزبایی گەرم لە کۆمەڵانی خەڵکی کوردستان دەکەین، ئومێدەوارین نەورۆزی ئەمساڵ مژدەی گۆرانکاریی دیموکراسیی و ھەڵبژاردن لەپێناو خزمەتکردنی باشتری گەلەکەمان و ژیان و گوزەرانیان بەدوای خۆیدا بھێنێت .
لە پەیامەکەدا هاتووە، "نەورۆز لە دیرۆکی گەلانی نەورۆزخوازدا جەژنی بەھار و نوێبوونەوەی سروشت و ژیانە، لە ژیانی نەتەوەی کوردیشدا بەتایبەتی جەژنی ئازادی و سەرفرازی ھێمای خەباتە بۆ بەگژداچونەوەی زوڵم و ستەمکاری، لە وێستگەی راپەڕینی ساڵی ١٩٩١یشەوە جەژنێکی سەرباری ئازادی نیشتمانییە کە رۆژی رزگاری کەرکوکی قودسی کوردستان و تاجی سەرکەوتنی راپەرینە ".
مەکتەبی سیاسیی یەکێتی دەشڵێت؛ نەورۆزی ئەمساڵمان، مژدەی قۆناغێکی تری خەباتی مەدەنی ھێناوە کە ھەڵبژاردنی پەرلەمانی کوردستانە، بۆ ئەم ئەرکەی خەبات بەگیانی ئازادیخوازانەی نەورۆزی دێرین وجۆش و خرۆشی راپەڕیەنەوە چاومان لەسەرکەوتنێکی گەورەی یەکێتیی نیشتمانیی کوردستان و ئەزموونی گەلەکەمانە تاوەکو رێڕەوی حوکمڕانی راست بکەینەوە، گوزەران و ژیانێکی شایان و سەرفرازتر، بێ جیاوازی و جیاکاری لەسەرتاسەری ھەرێمی کوردستاندا فەراھەم بکەین .
