کۆمەڵەی پیشەسازی نەوتی کوردستان ناسراو بە ئەپیکۆر، لەبارەی دەستپێکردنەوەی هەناردەی نەوتی هەرێمى کوردستان رایگەیاند، ئەوان پێشوازی لە گفتوگۆکانی جۆ بایدن، سەرۆکی ئەمریکا و محمەد شیاع سودانی، سەرۆکوەزیرانی عێراق دەکەن لەبارەی دەستپێکردنەوەی هەناردەکردنی نەوتی هەرێمی کوردستان.
لەراگەیەندراوەکەی ئەپیکۆر ئاماژە بەوەشکراوە، ئەوان ئامادەن بۆ بەردەوامیدان و بەپەلە دەستپێکردنەوەی گفتوگۆکان لەگەڵ حکومەتی هەرێمی کوردستان و حکومەتی عێراق بۆ دەستپێکردنەوەی هەناردەی نەوت لەرێگەی بۆری نەوتی عێراق - تورکیا
ئاماژە بەوەشکراوە، تەنیا مەرجیان بۆ دەستپێکردنەوەی گفتوگۆکان و دەستپێکردنی هەناردەی نەوت ئەوەیە، پێویستە مەرجە داراییەکانیان لەرێگەی نووسراوی فەرمییەوە دڵنیایی پێبدرێت لەبارەی وەرگرتنی پارەى نەوت لە رابردوو و داهاتووشدا.
هاوکات، مایلز کاکگینز، گوتەبێژى ئەپیکۆر رایگەیاندووە، کۆمپانیا ئەندامەکانی کۆمەڵەی پیشەسازی نەوتی کوردستان بە قەبارەی 10 ملیار دۆلار وەبەرهێنانیان لە سێکتەرەکانی نەوت و گاز لە هەرێمی کوردستاندا کردووە.
پێشتر ئەپیکۆر رایگەیاندبوو، بەهۆى وەستانى هەناردەى نەوتى هەرێمى کوردستان زیانى 15 ملیار دۆلار بە ئابوریى عێراق کەوتووە و نرخى نەوتیش لە بازاڕەکانى جیهان بەرز بووەتەوە.
