کەشناسێکى عێراقى هۆشداریدەدات لەو شەپۆلە بارانبارینەى عێراق و هەرێمى کوردستانى گرتووەتەوە و دەڵێت، ئەمشەو شەپۆلەكە دەگاتە ئەوپەڕى بەهێزیى خۆى.
سادق عەتیە، کەشناسى عێراقى رایگەیاندووە، ئەو شەپۆلە بارانبارینەى ئێستا بەشێک لە پارێزگاکانى عێراقى گرتووەتەوە بەتیپەڕبونى کات درێژدەبێتەوە و زۆربەى پارێزگاکانى عێراق دەگرێتەوە.
ئەوەشى خستووەتەڕوو، شەپۆلى بارانبارینەکە لە ئەمشەوى دووشەممەوە لە پارێزگاکانى هەولێر سلێمانى دهۆک نەینەواو بەشێک لەناوچەکانى ناوەڕاستى عێراق دەگاتە ئەوپەڕى بەهێزى خۆى، هۆشداریدەدات کە لایەنە فریاگوزاریەکان لەئامادەباشیدابن و داوا لەهاوڵاتیان دەکات لەشەوى دووشەممەوە تاوەکو بەرەبەیانى چوارشەممە گەشت نەکەن.
بەگوێرەى داتا و ئامارەکانى کەشناسى، تاوەکو ئێستا رێژەى بارانبارین لەهەرێمى کوردستان، لەهەمان ئاستى تێکڕاییەکانى ساڵانى پێشتردایە و لەبەنداوەکان بە بەراورد بەساڵانى رابردوو رێژەیەکى زیاترى ئاو گلدراوەتەوە.
