رۆژی پێنجشەممە، 11ی نیسانی 2024، ئاهەنگی دابەشکردنی خەڵاتەکانی بافتا بۆ یارییە ئەلیکترۆنییەکان لە شاری لەندەنی پەیتاختی بەریتانیا بەڕێوەچوو، یاریی ئەلیکترۆنی باڵدرز گەیت 3 (Baldur's Gate 3)، وەکو باشترین یاریی ساڵ هەڵبژێردرا و زۆرترین خەڵاتی بەدەستهێنا.
باڵدرز گەیت 3، لەپاڵ بردنەوەی خەڵاتی باشترین یاریی ئەلیکترۆنی بافتا، توانی ببێتە خاوەنی خەڵاتی هەڵبژێردراوی یاریکەران، کە لەلایەن خەڵکەوە هەڵدەبژێردرێت، هەروەها خەڵاتی بافتا بۆ باشترین موزیک، چیرۆک و ئادا، بەمەش یارییەکە بووە براوەی پێنج خەڵاتی بافتا.
چیرۆکی یارییەکە باس لە شانشینێکی خەیاڵی دەکات کە جنۆکە و جادووگەر و چەند کارەکتەرێکی کێوی تێیدا نیشتەجێن، بەگوێرەی ستۆدیۆکانی لاریان، باڵدرز گەیت 3، سەرکەوتنێکی بازرگانی بووە و زیاتر لە 10 ملیۆن دانەی لێفرۆشراوە.
هەروەها یاریی سوپەر ماریۆ برەزەرس وەندەر، بووە براوەی خەڵاتی یاریی ئەلیکترۆنی خێزانی و یاریی بە کۆمەڵ.
