ئەمڕۆ کۆبوونەوەکانی شاندى عێراق لەگەڵ بەرپرسانى باڵاى ئەمریکا دەستپێدەکەن و ئەندامێکى شاندەکە یەکەم کۆبوونەوەشیان لەگەڵ وەزیرى دەرەوەى ئەو وڵاتە دەبێت.
ئەمڕۆ دووشەممە، 15ـی نیسانى 2024، دیلان غەفوور، ئەندامى شاندەکەى عێراق لە ئەمریکا بەکەناڵ8ـی راگەیاند، ئەمڕۆ کۆبوونەوەکانیان لەگەڵ بەرپرسانى باڵاى ئەمریکا دەستپێدەکەن و یەکەم کۆبوونەوەشیان لەگەڵ ئەنتۆنى بلینکن، وەزیرى دەرەوەى ئەمریکا دەبێت.
گوتیشى، "زنجیرەیەک کۆبوونەوە لەگەڵ بەرپرسانى باڵاى ئەمریکا ئەنجامدەدەن و تێیدا پەیوەندییە سیاسی، ئەمنی و ئابوورییەکانى نێوان هەردوولا تاوتوێ دەکەن".
رۆژى 13ـی نیسانى 2024، محەمەد شیاع سودانى، سەرۆکوەزیرانى عێراق بەیاوەریى شاندێک سەردانى ئەمریکاى کرد و پێش سەردانەکەشى وتارێکى پێشکەشکرد و رایگەیاند، "ئامانجێکی سەردانەکەی کارکردن دەبێت بۆ راگەیاندنی کاتی کۆتاییهێنان بە ئەرکی هاوپەیمانیی نێودەوڵەتی لە عێراق".
رۆژى 14ى نیسانى 2024، باسم عەوادى، گوتەبێژى حکومەتى عێراق رایگەیاند، ئامانجى سەردانەکەى سەرۆکوەزیران بۆ ئەمریکا، کاراکردنى رێککەوتنى چوارچێوەى ستراتیجییە کە لە ساڵى 2008ـەوە واژۆکراوە و وەک پێویست جێبەجێنەکراوە.
گوتیشى، "پەیوەندییەکانى رابردووى هەردوو وڵات تەنیا لەلایەنى ئەمنی و سەربازیدا کورتکرابووەوە، ئێستا هەوڵدەدرێت هەنگاوێکى جیاواز لە پەیوەندییەکاندا بنرێت".
پێشبینى دەکرێت، لە دیدارە چاوەڕوانکراوەکەى نێوان سودانى و بایدن، دید و بۆچوون لەبارەى ژمارەیەک دۆسیە ئاڵوگۆڕ بکرێت، زۆرینەى ئەو پرسانەشی دەخرێنەڕوو، پێشتر لە رێگەى لیژنە لاوەکییەکانەوە رێککەوتنیان لەسەرکراوە.
