یەکێکە لە دیارترین مێژوونووسەکانی کورد، مێژووی هاوچەرخی کورد و رۆژهەڵاتی ناوەراستی نووسیوە، کەمال مەزهەر، لە رێکەوتی 16ی ئازاری 2021، کۆچیدوایی کردووە.
کەمال مەزهەر ئەحمەد، رێکەوتی 14ی شوباتی 1937، لە ناحیە ئاغجەلەری قەزای چەمچەماڵ لەدایکبووە، خوێندنی سەرەتایی و ناوەندی و ئامادەیی لە سلێمانی تەواوکردووە، لە قۆناغی ناوەندییدا، بە وانەکانی مامۆستا "حەمەرەش" کاریگەر بووە لە ئاستی مێژوودا و ئەمە وای کردووە حەز و خوێندنی بۆ مێژوو سەرهەڵبدات، وەکو خۆی ئاماژەی پێدەدات، ساڵی 1953، لە تەمەنی 16 ساڵییدا، یەکەم وتاری خۆی لە چوارچێوەی نەشرەیەکی قوتابخانەدا بڵاوکردووەتەوە، ساڵی 1959، یەکەم وتاری مێژوویی بەناونیشانی "رۆڵی کورد لە مێژووی شارستانییەتدا"، لە گۆڤاری بڵێسەدا بڵاوکردووەتەوە، لە هەمان ساڵدا، بە پلەی شەرەف، بەشی مێژوو لە زانکۆی بەغداد تەواودەکات، پاشان هاوشانی عیزەدین مستەفا رەسوڵ، مارف خەزنەدار و نەسرین فەخری، بەمەبەستی وەرگرتنی دکتۆرا لە مێژوو، ئەدەب و زمانی کوردی، رەوانەی یەکێتی سۆڤیەت دەکرێن، کەمال مەزهەر، سەرەتا بڕیار لەسەر لێکۆڵینەوە سەبارەت بە مێژووی کۆنی کورد دەدات، بەڵام بە پێشیازی رەحیمی قازی و عەلی گەلاوێژ، لە مێژووی هاوچەرخی کورد دەکۆڵێتەوە.
ساڵی 1963، بە ناونیشانی "بزاڤی رزگاریخوازی نەتەوەیی لە کوردستانی عێراق لە ساڵانی 1918 – 1932"، دکتۆراکەی وەردەگرێت، ساڵی 1981، پلەی پرۆفیسۆری وەرگرتووە، پاش ساڵانێکی زۆر لە خوێندن و لێکۆڵینەوە، دەست دەداتە نووسینەوەی دەیان کتێب، بە زمانەکانی کوردی، عەرەبی، روسی و ئینگلیزی بابەتەکانی نووسیوە، لە هەمان کاتدا، سەرپەرشتیی وەرگرتنی زیاتر لە سەد نامەی ماستەر و دکتۆرای کردووە، ساڵانی 1970 بۆ 2008، مامۆستای بەشی مێژوو بووە لە کۆلێژی ئەدەبیاتی زانکۆی بەغداد، ئەندامی کۆڕی زانیاریی کورد و ئەکادیمیای زانستیی کوردستان بووە.
لەماوەی ژیانی رۆشنبیریی و خۆتەرخانکردن بۆ نووسین، کەمال مەزهەر، دەیان کتێبی سەربارەت بە مێژووی کورد و سیاسەت بڵاوکردووەتەوە بە زمانە جیاوازەکان، لە دیارترینیان:
ئافرەت لە مێژوودا
ماکیاڤیلی و ماکیاڤیلیزم
چەند لاپەڕەیەک لە مێژووی گەلی کورد – دوو بەرگ
رێنیسانس
کرکوک وتوابعها، حکم التاریخ و الضمیر
رێکەوتی 16ی ئازاری 2021، لە تەمەنی 84 ساڵییدا، کەمال مەزهەر، لە وڵاتی ئەڵمانی کۆچیدوایی دەکات و پاش خۆی گەنجینەیەکی گەورە و گرنگی مێژووی هاوچەرخی کورد و زنجیرەیەک لە تێز و سەرنجی سیاسی تایبەت بە جیهانگەریی جێدەهێڵێت.
